‎Impuzamashyirahamwe y’Umupira w’Amaguru muri Afurika y’Iburasirazuba no Hagati (CECAFA) yatangaje ko u Rwanda ruzakira amarushanwa ane muri atandatu ateganyijwe gukinwa muri uyu mwaka wa 2026 arimo na CECAFA Kagame Cup igarutse i Kigali nyuma y'imyaka irindwi.
‎
‎Irushanwa rya CECAFA Kagame Cup rihuza amakipe yabaye aya mbere iwayo mu karere riteganyijwe kuba kuva tariki ya 18 Nyakanga kugeza ku ya 9 Kanama 2026, rikaba ryaherukaga kubera mu Rwanda mu mwaka wa 2019 ubwo ryakinirwaga mu mijyi ya Kigali na Huye.
‎
‎Andi marushanwa atatu azabera mu Rwanda arimo imikino y’amashuri izwi nka CAF African Schools Football Championship izaba hagati ya tariki 22 na 25 Nyakanga ndetse n'imikino yo gushaka itike ya CAF Champions League y’abagore iteganyijwe kuva tariki ya 22 Kanama kugeza ku ya 6 Nzeri 2026.
‎
U Rwanda ruzanakira kandi imikino yo gushaka itike y’Igikombe cya Afurika cy’abatarengeje imyaka 17 mu bahungu izakinwa kuva tariki ya 10 kugeza ku ya 25 Ukwakira 2026.
‎
‎U Rwanda rwahawe kwakira iyi mikino mu gihe Tanzania yo yatoranyijwe kwakira irushanwa rya CECAFA y’abakobwa batarengeje imyaka 17 rizaba kuva tariki ya 30 Gicurasi kugeza ku ya 14 Kamena 2026 n’imikino yo gushaka itike ya CAN U-20 izaba kuva tariki ya 22 Kanama kugeza ku ya 6 Nzeri 2026.
‎
Kugeza ubu ariko amarushanwa ya CECAFA Senior Challenge Cup na CECAFA Beach Soccer Championship ntabwo biratangazwa ibihugu bizayakira.
‎
‎Kwizerwa na CECAFA bije nyuma y’uko ishyirahamwe ry’umupira w’amaguru ku Isi (FIFA) riherutse kwemeza u Rwanda mu bihugu bizakira imikino ya FIFA Series 2026 izaba muri Werurwe uyu mwaka; ibintu bishimangira ubushobozi bw'iki gihugu mu kwakira amarushanwa akomeye mpuzamahanga.
‎
‎Amashyirahamwe ya Ruhago agize CECAFA ni irya Kenya, Uganda, Tanzania, Sudani y’Epfo, Sudani, Ethiopia, Eritrea, Zanzibar, Somalia, u Rwanda, u Burundi na Djibouti.