‎Umutoza Mukuru wa Mukura Victory Sports, Nshimiyimana Canisius, yatangaje ko imisifurire mibi y’umusifuzi Uwikunda Samuel ari yo ntandaro yatumye ikipe ye itsindwa na Rayon Sports ibitego 2-1.

‎‎Uyu mukino w’Umunsi wa 22 wa Shampiyona y’Icyiciro cya Mbere mu Rwanda, wabereye kuri Kigali Pelé Stadium kuri iki Cyumweru, tariki ya 22 Gashyantare 2026.

‎‎Rayon Sports yabonye ibitego bibiri hakiri kare binyuze kuri Aziz Bassane ku munota wa mbere n’icya Ramazani Tshimanga ku munota wa mbere w'inyongera y'igice cya mbere.

‎‎Mukura VS yashatse kwishyura mu gice cya kabiri, ibona igitego cya mbere ku munota wa 77 gitsinzwe na Joseph Sackey, inakomeza gusatira ishaka inota byibuze.

‎‎Muri uku gusatira, havutse impaka nyinshi ku byemezo by'umusifuzi wari uyoboye umukino.

‎‎Ku munota wa 84, Uwikunda yemeje ko Samuel Pimpong yabangamiye umunyezamu Kwizera Olivier ubwo yatsindaga igitego n'umutwe, amwima igitego amuha n'ikarita y'umuhondo.

‎Mukura VS yanangiwe penaliti ebyiri yiyumvishaga ko yagombaga guhabwa, zirimo iy'ikosa bavuga ko ryakorewe Iradukunda Elie Tatou mu rubuga rw'amahina, n'umupira bashinja Uwumukiza Obed gukoraho n'akaboko ku munota wa 90.

‎Mu kiganiro n’abanyamakuru nyuma y'umukino, umutoza Nshimiyimana Canisius yagaragaje akababaro ke, anenga yivuye inyuma imisifurire yaranze uyu mukino.

‎Yagize ati “Ntabwo njya nkunda kuvuga ku basifuzi ariko gutakaza aya manota harimo ukuboko gukomeye k’umusifuzi. Igitego cy’umutwe twatsinze kivuye muri koruneri, ngira ngo mufite amashusho muri abanyamakuru muze kwitegereza murebe.”

‎Uyu mutoza yakomeje ashimangira ko amakosa yakozwe n'umusifuzi agaragara neza mu mashusho y'umukino gusa akayirengagiza nkana.

‎‎Ati “Hari umupira Tatou bamutegeye mu rubuga rw’amahina bamukubita amaguru agiye gutera ishoti arabyihorera, hari umupira bateye ku kaboko mu minota ya nyuma na byo mu mashusho biragaragara, ibyo byose arabyirengagiza. Twatsinzwe amanota turayatakaje tugiye gutegura iby’ubutaha.”

‎‎Nshimiyimana yasoje agaragaza igihombo gikomeye ikipe yagize kubera aya makosa, asaba inzego zibishinzwe kugira icyo zikora mu maguru mashya.

‎‎Ati “Ni ukuvuga ko ababishinzwe bagomba kureba uko bikorwa kugira ngo barusheho gukosora. Ubu twaje ku mukino dutakaza byinshi, yaba hotel yaba ingendo byose ni amikoro aba yakoreshejwe. Gutsindwa muri ubu buryo birababaza kuko twatakaje byinshi. Ntidushobora kuvuga byinshi ku basifuzi kuko bafite uko babibona, kandi benshi babonye amakosa abaho. Ni ugutegereza tukareba ibizava muri ibi.”

‎Gutsindwa uyu mukino byatumye Mukura VS iguma ku mwanya wa munani n’amanota 31.