Ikipe ya Kepler Women's Basketball Club ikomeje kwerekana ko yifuza kuba imwe mu zikomeye muri basketball y'abagore mu Rwanda no mu karere, nyuma yo gusinyisha abakinnyi babiri bafite amazina akomeye ari bo Hope Butera ukomoka mu Rwanda na Shawnta Grenetta Shaw wo muri Leta Zunze Ubumwe za Amerika.

Hope Butera ni umwe mu bakinnyi b'abanyarwanda bafite izina rikomeye muri basketball y'abagore. Yavutse ku wa 10 Gashyantare 2001 i Kigali, afite uburebure bwa metero 1.97, akaba akina nka center cyangwa forward. Azwi cyane kubera ubuhanga bwe mu kurinda agace k'imbere, gufata imipira ivuye ku nkangara ndetse no gufasha ikipe mu bwugarizi.

Mbere yo kuba umukinnyi wabigize umwuga, Butera yize kandi akina basketball muri Leta Zunze Ubumwe za Amerika aho yabanje muri South Georgia Technical College mbere yo gukomereza muri Florida International University (FIU). Nyuma yaje kurangiriza amasomo ye muri University of Idaho aho yarangije mu mwaka wa 2024 akinira Idaho Vandals. Muri iyo kipe yagaragaje urwego rwo hejuru ndetse anagira umukino yatsinzemo amanota 23, ayo akaba ari yo menshi yigeze gutsinda mu mukino umwe muri kaminuza.

Nyuma yo gusoza amasomo ye, Butera yatangiye urugendo rw'umwuga mu ikipe ya CAB Estepona yo muri Espagne mbere yo kwerekeza muri Al-Adeem yo muri Qatar mu mwaka wa 2026. Mu Rwanda kandi yagarutse gufasha REG WBBC gutwara igikombe cya shampiyona ya 2025. Ni umwe mu nkingi z'ikipe y'igihugu y'u Rwanda kuva mu 2019, aho yagize uruhare rukomeye muri Women's AfroBasket 2023 ndetse no mu mikino yo gushaka itike y'Igikombe cy'Isi cya 2026 yabereye i Kigali.

Undi mukinnyi mushya wa Kepler ni Shawnta Grenetta Shaw, umukinnyi ukina nka point guard uzwiho umuvuduko, ubuhanga mu gutanga imipira ivamo amanota no gutsinda amanota menshi. Yavukiye i Nashville muri Tennessee muri Amerika, afite uburebure bwa metero 1.57.

Shaw yakiniye amakipe ya kaminuza arimo Troy University Trojans ndetse na Jacksonville State University Gamecocks aho yarangirije amasomo ye mu mwaka wa 2023. Nyuma yaho yatangiye gukina nk'uwabigize umwuga mu bihugu bitandukanye birimo Iceland, Luxembourg, Slovenia na Mexico.

Muri Iceland yakiniye ikipe ya Snæfell aho yigeze gutsinda amanota 29 mu mukino umwe. Muri Luxembourg yakiniye Musel Pikes aho yagiraga impuzandengo y'amanota 23 buri mukino. Yanakiniye ZKK Cinkarna Celje yo muri Slovenia mbere yo gukomeza urugendo rwe mu yandi makipe yo ku rwego mpuzamahanga.

Gusinyisha Hope Butera na Shawnta Shaw ni intambwe ikomeye kuri Kepler WBBC, kuko ihuje umukinnyi ufite uburebure n'imbaraga zo mu bwugarizi hamwe n'undi ufite umuvuduko n'ubuhanga bwo kuyobora umukino. Abasesenguzi b'umukino wa basketball bemeza ko aba bakinnyi bombi bashobora kuzafasha cyane Kepler mu rugendo rwo guhatanira ibikombe bya shampiyona y'u Rwanda ndetse n'amarushanwa mpuzamahanga.

 Kepler WBBC ubu iri kumwanya wa 2 kurutonde rwa shampiyona inyuma ya REG WBBC mu mikino 11 bamaze gukina kugeza ubu.