‎Ikipe ya RSSB Tigers igiye guhagararira u Rwanda ku nshuro yayo ya mbere mu mikino ya Basketball Africa League (BAL 2026) yongereye mu bakozi bayo James Maye Jr na Kenneth Gasana nk'abatoza bungirije bazafasha umutoza mukuru Henry Mwinuka.

‎

‎Iyi kipe yahawe aya mahirwe nyuma y'uko tariki ya 12 Werurwe 2026 Ishyirahamwe ry'Umukino wa Basketball mu Rwanda (FERWABA) ritangaje ko ari yo izasimbura APR BBC yari yafashe umwanzuro wo kutazitabira iri rushanwa rigiye gukinwa ku nshuro ya gatandatu.

‎

‎RSSB Tigers iherereye mu itsinda rya Kalahari Conference rizakinira imikino yaryo i Pretoria muri Afurika y’Epfo guhera tariki ya 27 Werurwe kugeza ku ya 5 Mata 2026.

‎

‎Mu rwego rwo kwitegura neza iri rushanwa rihuza amakipe yitwaye neza iwayo, biteganyijwe ko iyi kipe igomba kongeramo abandi bakinnyi b'Abanyarwanda n'abanyamahanga bazayifasha guhatana.

‎

‎Kuzana James Maye usanzwe utoza APR BBC bishobora gutanga umusaruro ufatika kuko mu mwaka ushize yafashije iyi kipe y'Ingabo z'Igihugu kwegukana umwanya wa gatatu, iba ikipe ya mbere yo mu Karere ka Afurika y’Iburasirazuba ikoze aya mateka kuva irushanwa ryatangira mu 2021.

‎

‎Amakipe umunani azaba yitwaye neza kurusha ayandi muri Kalahari Conference na Sahara Conference azabona itike yo guhurira i Kigali mu Rwanda, ahazabera imikino ya kamarampaka n’iya nyuma guhera tariki ya 22 kugeza ku ya 31 Gicurasi 2026.