Uyu mukino wabereye i Radès, wagaragayemo guhuzagurika cyane ku ruhande rw’u Rwanda by’umwihariko mu duce two hagati tw’umukino (2nd & 3rd Quarter), ari naho Tunisia yashyiriyemo ikinyuranyo gikomeye.
Mu minota 10 ya mbere y’umukino, amakipe yombi yagaragaje imbaraga zenda kungana haba mu kugarira no gusatira, ku buryo agace ka mbere karangiye anganya amanota 16-16.
Gusa ibintu byaje guhindura isura mu gace ka kabiri, ubwo Tunisia yatangiraga kurusha cyane u Rwanda binyuze kuri Jawhar Jawadi wazonze ubusatirizi bw’u Rwanda, bituma igice cya mbere kirangira ikinyuranyo kigeze ku manota icyenda (Tunisia 40-31 Rwanda).
Agace ka gatatu ni ko kagaragaje intege nke zikomeye ku ruhande rw’u Rwanda, kuko ari bwo rwahuye n’akaga gakomeye ko kubura imipira nyinshi bashyira mu nkangara. Muri aka gace, u Rwanda rwinjije amanota 11 gusa, mu gihe Omar Abada wa Tunisia we yari yigaruriye umukino, akomeza gushyiramo ikinyuranyo cyagoranye gukuramo.
Mu gace ka nyuma, u Rwanda rwagerageje kugaruka mu mukino binyuze ku manota yatsinzwe na David McCormack ndetse na Ndizeye Dieudonné, ariko amazi yari yamaze kurenga inkombe kuko ikinyuranyo Tunisia yari yashyizemo mu duce tundi cyari cyamaze kuba kinini cyane.
Kuri ubu u Rwanda rumaze gutsindwa imikino ibiri yikurikiranya muri iri rushanwa ry’amajonjora. Amaso yose ubu ahanzwe umukino wa gatatu ari na wo usoza iyi "Fenetre", aho u Rwanda rugomba kwisobanura na Nigeria kuri iki Cyumweru, tariki ya 30 Ugushyingo 2025.
