Ubuyobozi bwa Rayon Sports bwemeje ko bwasinyishije umukinnyi wo hagati Ndayishimiye Didier wari usanzwe akinira AS Kigali hagamijwe kongera imbaraga no kubaka ikipe izatwara ibikombe mu mwaka w'imikino utaha.

‎

‎Ni amakuru yatangajwe n'ikipe binyuze ku mbuga nkoranyambaga zayo kuri uyu wa Gatanu tariki 5 Kamena 2026.

‎

‎Uyu musore yongerewe mu bakinnyi bashya ba Gikundiro nyuma y'imyaka itatu yari amaze muri AS Kigali kuva mu 2023 kugeza mu 2026. 

‎

‎Mbere yo kwerekeza muri AS Kigali, uyu mukinnyi yatangiriye kugaragaza impano ye muri Heroes FC hagati y'umwaka wa 2022 na 2023. 

‎

‎Uretse kwitwara neza mu makipe asanzwe, Ndayishimiye yanakiniye amakipe y'igihugu mu byiciro by'abato. Yahereye mu Ikipe y'Abatarengeje Imyaka 17, azamuka mu y'Abatarengeje Imyaka 20 yakinnye irushanwa rya CECAFA ryabaye mu 2024 ndetse impano ye yatumye ahamagarwa no mu Ikipe Nkuru y'Amavubi ikina irushanwa rya CHAN.